ജനനി..!!

പെയ്യാൻ മറന്നൊരാ നീർക്കണങ്ങളോടോ,
ഒഴുകാൻ മറന്നൊരാ അരുവിയോടോ,

വീശാൻ മറന്നൊരാ കാറ്റിനോടോ,
വിടരാൻ മറന്നൊരാ പൂവിനോടോ,

ഇരുളാൻ മറന്നൊരാ രാത്രിയോടോ,
പുലരാൻ മറന്നൊരാ പുലരിയോടോ,

വിദ്യ മറന്നൊരാ ഗുരുക്കളോടോ,
ഗുരുത്വം മറന്നൊരാ ശിഷ്യരോടോ,

പിതൃത്വം മറന്നൊരാ പിതാവിനോടോ,
പതിയെ മറന്നൊരാ ഭാര്യയോടോ,

നാദം മറന്നൊരാ കുയിലിനോടോ,
നാട്യം മറന്നൊരാ മയിലിനോടോ,

ഉദയം മറന്നൊരാ സൂര്യനോടോ,
ജ്വലിക്കാൻ മറന്നൊരാ ജ്യോതിയോടോ,

അലകൾ മറന്നൊരാ തിരകളോടോ,
ഓളം മറന്നൊരാ നദികളോടോ,

ആരോടു ചൊൽകേണ്ടു ഞാനെൻ നൊമ്പരം,
ചൊല്ലാതെ തിരിയുവതെങ്ങനെ ഞാൻ,

നിങ്ങൾക്ക് മാതൃത്വമേകീ ഞാൻ,
ചുറ്റും കറങ്ങി കാത്തൂ ഞാൻ,

ജലമേകിയീ മർത്ത്യന്റെ ദാഹമകറ്റീ,
ഫലമെകിയീ മർത്ത്യന്റെ പശിയകറ്റീ,

എന്നിൽ ചവിട്ടി നിന്നുകൊണ്ടിന്നു നീ,
എൻ ജീവനെന്നിൽ നിന്നകറ്റീടുന്നു,

ഇനിയും ക്ഷമിക്കും ഞാനിനിയും സഹിക്കും ഞാനെൻ,
മരണം വരെയും കാത്തീടും ഞാൻ,

നിൻ മാതാവെന്നു നീ സ്മരിച്ചില്ലയെങ്കിലും,
ഈ ജനനിക്കു നീയെന്നും പുത്രനല്ലേ...!!