ഡംബ്ബൽ വിപിന്റെ നേതൃത്വത്തിൽ റൂമിൽ വട്ടം കൂടിയിരുന്ന് 50 പൈസാക്ക് പരല് കളിച്ച്‌ ചീട്ടുകളി പഠിച്ചു തുടങ്ങിയ 2011-2012 കാലഘട്ടം. കൊട്ടാരം പോലുള്ള ഞങ്ങളുടെ മണിമാളികയിൽ സന്തോഷത്തിന്റേം സമാധാനത്തിന്റേം വെള്ളരിപ്പ്രാവുകൾ പാറിപ്പറന്നു നടക്കണ നല്ല ദിവസങ്ങൾ. ഇരുട്ട് വീണുതുടങ്ങിയ, മഴച്ചാറ്റലുള്ള ഒരു തണുത്ത സായാഹ്നത്തിൽ, മുഖത്ത് ഒരു പാൽപ്പുഞ്ചിരീം കയ്യിൽ രണ്ട് ഡംബലുമായി, ഞങ്ങൾ സ്നേഹത്തോടെ 'ഇക്കാ' വിളിക്കുന്ന ആ മൊതൽ ഞങ്ങടെ വാടക മാളികേടെ വാതിലും തള്ളിത്തൊറന്ന് അകത്തേക്ക് കേറി വന്നു. ചീട്ടുകളിയിൽ നിന്നും ചെറുതായി ശ്രദ്ധ തിരിച്ചുകൊണ്ട് ഞങ്ങൾ ഇക്കയെ നോക്കി.